事隔咗大半年先至諗到要継續陳述我對雪梨嘅見聞，真係考起我嘅記憶力喇！好彩有相片用做参考。
雪梨自由行（二）
我哋響出租屋過第一日，第日星期六一早起身，我哋食埋剩下嗰三條麪包當早餐，立美就帯埋手袋手信，打算出去玩到夜晚就上機返墨市。前晚聚會嗰陣已經約佐雪芳，學濤夫婦同建立夫婦見面，所以我哋三人坐火車到Circular Quay 會合，但係雪芳臨時有事，Lindy ，Lea ，學濤遲D先至到，所以我哋三個改搭渡輪去雪梨海港対面島Cockatoo Island 鸚鵡島參觀。
 |
| Watsons Beach, NSW |
我好鍾意雪梨嘅公交系统 ，尤其持有長者卡的乘客有好多優恵。外省乘客要响啓程两至三星期前申請，雪梨公交網頁有详细说明。我哋三人行坐渡輪由Circular Quay 去鹦鹉島大概三十分鐘左右。Cockatoo Island 係世界遗產名册之一，所以有好多遊客慕名而來。我哋一早就比較少遊客，上岸就見到好大嘅信息台方便游客詢問，有免費小組響導等，好周到。好多歷史古蹟保持原狀，仲有由殖民時期嘅囚犯闢山開路建梯直通山頂，山有幾間雅緻旅館，近海灘有露營設備可以租用，價錢都幾貴。本地人就多數夜晚先過島，邊歇酒邊遙望對面岸，燈光閃耀嘅雪梨港。一𥵃燈光一顆星🌟，聚成星河載人來…即時間感覺自己變詩人了。
烈日當頭，我哋去島上唯一間咖啡店，坐低飲杯咖啡等下班渡輪返雪梨港和學濤他們會合。船一靠岸就見到他們在另一架度輪對我哋揮手。原來佢哋計好時間，我哋一齊轉另條渡輪線去Watsons Bay。全程大約 30 分鐘，兩岸風景好靚，尤其經過Opera House 嗰陣，遊客擁去船甲板影靚相，我當然都唔放過機會喇！途中停響半路嘅Rose Bay 碼頭。
 |
| Happy Lunch |
一到Watsons Bay 岸就聴到搖滾音樂，烈日當空加埋D勁音樂，真係好想跳落涼浸浸嘅海水來冷靜一下，俾我兩隻腳唔冼跟住音樂跳下跳下，哈哈😄。行上碼頭右邊係出名嘅炸魚薯條外賣店Doyles on the Beach，然後見到一個大公園, 有好多高高嘅老樹環繞成一把巨大嘅天然傘，正啱係學校假期所以好多小朋友響公國玩，好幸福！健立夫婦同學濤夫妻請我哋去一間兩層樓嘅餐館，樓下主要係酒吧同咖啡，多數係後生靚仔靚女，無憂無慮嘅笑聲，好令人羨慕。諗起自己嗰陣掛住點樣遠走高飛，為前途搏命，邊度有咁開心呢。不過依家諗落開心係由自己定嘅，記得我亞爸整日都講「知足者貧亦樂，不知足者富亦憂」。我依家其實好知足，所以我都好開心😃。
 |
| At the restaurant |
我哋上樓揾到一張長桌夠七人坐，健立主席嗱嗱聲去點菜，學濤亦唔拾輸叫啤酒俾我哋歎。佢哋嘅熱情令我感到好幸福！飲飽食醉之後，Lindy 提意行路去公園對面嘅景點The Gap Lookout 參觀。
The Gap Lookout 前面有巴士站，好方便本地人或駕車到步。我哋踏咗大約二十步梯級就睇到眼前一片藍色海灣，左右都有行人路直通到山崖頂點。嘩！到咗高處先感覚到高處不勝「寒」，風好大好凍。好多遊客影咗相都未惜得落去，佢哋坐響石礁，眼望遠方，默默無言好似享受緊難得嘅心靈與自然構通，拋開煩惱嘅𡨴靜。我自己就頂唔順咁猛烈嘅太陽，快手快腳行落去揾地方坐。無計啦，幾十歳唔可以同十幾歳比喇！😔
 |
| The Gap Lookout |
我哋響涼亭休息大概一個鐘就搭渡輪返Circular Quay 碼頭，然後各行各路返屋企。立美趕搭機返墨爾本，我哋兩夫婦継續順著Cỉrcular Quay 行到 Opera House 。天色䦕始黑，企響沿岸睇晚霞真係好靚！心裡面諗起首歌「夕陽一霎時間又向西，留下了晚霞更艷麗…」，又有D幸福感覚，哈哈😄
唔知唔覚就企咗成個鐘，突然間音樂響起來，我走去靠近樓梯邊望落去，下一層係餐館，見到樂隊同埋一位金髮美女正演唱佢嘅作品，原來嗰位靚女歌手響澳洲樂壇都有D名氣，週未先至來餐館演出。我拍爛手掌來擁戴佢不特止，我仲落去揾返個位坐，叫半打雪梨石蠔，一杯白酒慢慢歎，又有D幸福感覚⇻。有幾位後生女一邊喝酒一邊跳舞，佢哋玩得好開心。帯著滿懐歡樂，我哋搭火車返Regents Park 過一晚然後𨍭去市中心另一客棧住多三日。
係咁先，下次再續。祝各位同學仔快樂幸福！
翠群
No comments:
Post a Comment