呢個月係亞坤（我嘅先生）響鬼門関大歩攬過一週年。佢響舊年做佐心臟及血管手術。多得上天保佑，之後康服都好順利。呢次去雪梨，因為要顧慮到手術後嘅影響，我哋唔敢搭飛機或自駛長途車而改搭火車。
早幾個星期已經約好立美和曼燕一齊響雪梨會合，可惜曼燕有事唔去得。因為初次搭火車，我事前參考資料例如響邊度上車落車，邊度轉車去出租屋等等……有好準備就安心啲。
出發
星期四晚我哋兩人搭亱班火車，原本以為響火車會一覚瞓到天光，點知鉄路軌道啲聲音以及震盪聲整到我響半醒半瞓之下，咁就到佐雪梨火車縂站。嗰陣時仲係好早，我哋抽住呢行李都唔方便四圍盪，所以決定去出租屋試下可否提早攞屋。我係用Airbnb訂佐一間兩房townhouse，響雪梨同卡市半路近火車站嘅一個埠仔。屋主係中國人，所以都好相量，叫我哋出去食早餐先，等佢清潔🧹好再來。我哋放低行李，行路去附近購物中心，食佐早餐都未收到電話通知，當日天氣又好熱所以打算去圖書館歎冷氣。點知圖書館未開門，要等多十分我哋先至入去𢵧番張靚沙發坐，歎冷氣睇報紙，無幾耐屋主打電話📞叫我哋去攞鎖匙。吖呀！真係整個人髹曬。
有件事唔記得講俾大家知，就係我一早巳經通知雪梨嘅同學仔。真係好彩，學濤嗰日有假期，佢來接我哋去卡市會合立美。立美一個人搭飛機來，第日晚就要飛返墨市，真係有心，唔怪得知個個都話鍚曬佢！哈哈！
卡市Cabramatta好多美味中越餐館，到雪梨就一定要去試下喇。學濤放低我哋，佢要去揾車位拍佢架靚Lexus。響卡市拍車要認真留意時間地點，分分鈡被食牛肉乾（即係被罰錢）好唔低。我哋落車行幾步就見到立美。佢攞住個手袋好軽鬆，一啲都唔似響墨市啱啱落機。所以話齋自由最可貴，想去邊就去邊。我咃三個企響街邊等學濤返來嗰陣，見到一間舖有好多人排長龍買蔗水，嘩！五文兩大杯，咁平幾大都要飲番杯。響墨市五文整係買得一杯。卡市蔗水平靚正，聽講嗰度呢蔗係老細自己個農塲種，好新鮮，讚！ (附圖蔗水）
等到學濤來，佢帶我哋三個去當地好紅嘅俱樂部 - Cabra-Vale Diggers Club, Canley Vale飲早茶。 Lea （學濤太太）已經響嗰度等緊我哋。嘩！估唔到卡市有咁多高檔嘅club。老實講我好少去club玩，呢次大開眼界，都係多得學濤夫婦好招呼。
 |
| 中餐部 |
飲飽食醉後Lea 提意去新開嘅Fashion Spree Outlets 響City of Liverpool 玩，有可能買到平靚正嘢。其實墨市都好多類似商場，但我同立美都想見識下。果然我哋全部買到平靚正嘅貨做手信。立美當初帶一個手袋來，依家加多一個大袋返去，嘻嘻…有正貨，咪放過係我哋女人嘅政策！之後Lea又帶我哋返卡市買D 嘢食俾大家聚會用。可以講係我從來未曾食過咁平嘅越南麫包，兩文半一條！原價係三文，五週年紀念所以特價。 Lea 好嘢！讚👍
立美買佑十條麫包，我哋返去出租屋等其他同學來斉就開大食會啦。最先到係樹坤帶佐一盤banh cuon cha lua 來。跟著雪芳和Anh Triem帶兩盤banh bot loc 同埋一盒雪芳親自做嘅杏仁酥，真才實料又啱甜，食剩嘅我全部帶返墨市呢。然後Lindy - 建立太太帯自家做嘅大蝦球芝麻醤日本冷麪，再加兩樽紅酒一樽白酒同埋酒杯。 Lindy 好細心周到，讚👍！聽我描寫，唔知各位可否留口水呢？哈哈 !
 |
| （入得廚房出得廰） |
住出租屋有一點方便就係我哋可以 大聲講大聲笑，如果隔籬無申怨就得喇。最後建立到佐我哋就即刻開餐，筷子碗唔夠都無問題，仲有天生嘅一對手呀嘛！之後我哋趁機會討論關於明年聚會主題及初步計劃，大家都已經有D概念喇。我亦唔講咁多，留番俾大會正式宣佈吧！
 |
( 由左至右 Anh Triem,樹坤,建立, Lindy, Lea,立美,翠群,雪芳, 學濤 )
|
夜色巳晚，歡樂時光漸漸逝去，大家挾手挾腳清理現塲，然後依依不捨講聲byebye，我哋之間嘅友情又更上一層樓！而家一齊回憶嗰晩嘅歡樂吧！
係咁先，下次再續。
翠群
No comments:
Post a Comment