歷史動亂-越戰逃難劫後餘生回憶錄(五)(羅偉銓) (11/23/14)

第四次計劃失敗

Khu bao ton thien nhien Binh Chau 係當年森林, 係成個森林，當年就係要穿過去，先到Hồ Cốc海灣，依家有條路叫 Ven Biển，以前冇架。

自從XUÊN MỘC 敗露，唔可以再攪。大偈 (第一次偷渡，從漁船游上岸，被遺留之漁船機房手) 暫時落腳於我大家姐家中。經佢嘅人事關系，介紹我大姐夫結識到一批Phan Thiểt 船主，於大姐夫之交際下做了中間人, 撮合船主及碼頭。

今次由我大姐夫與Long Hai 一名居民合作。呢位居民居住在龍海。沿海灘一個山上坡上，面對一條由Iong Hải 至Đất Đỏ沿海小路，小路兩旁係一片草林，若人藏在裡面，踎底外面係睇唔見。草林一方係居民住所，另一方便是海灘。這個海灣是一個非常理想上船碼頭，為咗解決接駁人上大船問題，組織人亦售買一個大籮，Suối Thùng(潘切，芽莊一帶船民用嚟做海上交通工具)。

至於點送偷渡客到龍海，就由我大姐夫負責。安排一架大貨車，為了不受人注目，只可以在沿途逐段接三至四人上車。當貨車駛到這居民住所對開之小路時，(這一段小路，正好兩頭係山坡高位，中間凹位，當貨車停在凹位時，兩邊小路係睇唔見貨車。同時小路兩邊高位都有人把守。若有車駛到, 便通知停止落人) 得到安全訊息，開始落人，即刻走人草林。真係時也命也，千算萬算都算唔到，有咁啱得咁橋，從路旁山坡上有人騎着單車下來。目睹一切，真係鹹蛋滾湯，心都實晒，當時心諗，今次衰啦！穿咗煲，(呢個不速客都算運滯，當佢騎單車到小路高位時, 遇上放哨那位仁兄，用刀將佢捉拿，帶入草叢將佢綁手綁腳，連口都封埋。偷渡客中亦有位醫生，替佢打咗支麻醉針。可能太重手，打得太多，我見佢口吐白泡，倒霉) 事情發生太突然。嗰位負責同漁船通訊號之仁兄，怕敗事，失踪唔知死咗去邊。同大漁船約定時間，都仲未見佢出現，直至過晒時間先至現身。聯絡失敗，時間一分一秒咁過。將近天光，所有人退回居民屋前草叢。我心諗，咁嘅環境唔走就有鬼，三十六着走為上着，我同三個外甥，及我姐夫之兩個堂表弟打眼色，話要出外小解，一走了之。

沿著小路向Đất Đỏ 方向行，因我計過數, 若朝龍海方向行會遠好多，停留在沿岸小路越長時間越危險，若步行到Đất Đỏ將會有街車搭返Bà Rỉa。邊行邊心慌。好彩當時我哋幾個都穿上Thanh Niên Xung Phong 衫，都過到骨架。終於平安返西貢。事後聽聞所有人雞飛狗走，有一批人走甩，亦有一部份人被捉。 ...(下文待續)