 |
| Khu bao ton thien nhien Binh Chau 係當年森林, 係成個森林，當年就係要穿過去，先到Hồ Cốc海灣，依家有條路叫 Ven Biển，以前冇架。 |
前兩次失敗，今次由我三姐外家組織，萬事俱備，充氣橡皮艇有，食水有，乾糧有(Gạo Say) 通通一早運入叢林收藏。因前二次失敗，呢兩三個月嚟，咁多陌生人群出出入入XUÊN MỘC，為免太張揚，所以將偷渡客分多日到XUÊN MỘC，亦安排分批入樹林，因今次自己人辦事，我亦担當一角色。早一日帶領一批入樹林。因叢林內已儲有食糧，所以將廿多人藏於一個安全隱蔽地方係冇問題，等待第二晚另一批人會合。
其中亦發生一件不幸事，須知森林內蛇蟲鼠蟻，乜都有。有位仁兄唔小心俾毒蛇(青竹彪，蛇身青色，有如樹葉一樣顏色，好難分別)咬傷手，手掌紅腫，劇痛無比，為著安全，立刻將他帶回村落，找當地居民醫治，(民間有民間醫術，唔知用乜野樹葉咬碎來醫，當晚該仁兄再跟另一批人歸隊)。
人始終離唔開一個貪字，條村得只六戶人，若大家同心合力，大大增加成功機會。可惜人心不足蛇吞象，呢條財路點會放過，若果得知某家有行動，其他幾家就各自收客，一個收幾兩，收多幾個，您話唔發都幾難。所以當晚人齊，船主見咁多生面孔，都唔係自已人，點點人數，嚇了一驚。人數多出一倍，漁船根本負荷唔起。若所有人上晒船，漁船非沉不可，船主唯有打訊號取消行動。
當晚過程中，偷渡客躲藏在離海灘不遠之叢林中，我與幾位人仕在海灘留意周圍環境。其間原來叢林中已經發生意外。有一對夫妻係當地游擊隊，發現大批人在叢林中，只說了一句(Máy người ờ đây làm gì ) 之後就離去。可能佢驚寡不敵眾，蟻多褸死象，返去班馬。發生咗呢件事，偷渡客嗱嗱啉退入森林，撤退收檔。我地呢班懵佬响海灘都唔知發生咗事。當這倆夫妻拆返時同我哋撞個正。今次舐嘢！要我哋將身上財物通通取出。大家唯有死求，話被人呃，希望佢放過，可能佢都係見金開眼，真係有錢可以駛得鬼推磨，終於放走我們，肥佬着笠衫，幾大就幾大，有咁快走咁快。
自從多次偷渡失敗後，偷渡客撤出叢林難免會有人發覺。當地公安似乎收到消息，頻頻監視。遇上城市人到,都捉回公安局扣查，同時亦聽聞先前在海灘釋放我們之游擊夫婦已經被捕。唉！雲頭上跑馬，露出馬腳，已經穿晒煲。此地不宜久留，再唔走留低，黃鱔上沙灘，唔死一身潺，通通放棄，乜都唔要，走之大吉。(當年家財損失慘重，血本無歸)...(下文待續)
No comments:
Post a Comment