唔知係唔係老咗冇後生仔咁猛，出外跑咗一日就承個人散晒，第日要响屋企休養先恢復元氣，所以話齋，有乜嘢心願就要快快做咗，唔係到時會力不從心啦，係唔係呢？今日坐低飲啖茶食個包好梳乎，難得偷得人生半日閒，繼續講古畀各位同學仔分享下，雖然响呢個時點冇乜嘢高興事件發生，我盡量輕鬆趣誌咁陳述吧！
呢個時候我哋開始收到响外邊嘅信訊，响台灣，香港有親人嘅家庭亦開始辦家庭團聚手續，住關島嘅人就轉去美國，陸續有人偷渡去馬來西亞，印尼，泰國，香港等難民營。每晚阿爸會細細聲收聽BBC中文廣播電台，好多人點唱送俾响越南嘅親戚朋友，有幾首經典歌曲，幾乎日日都有人點唱，例如許冠傑唱嘅「紙船」…路經海邊見隻小船，情人萬里心暗酸，異鄉的她腦海湧現，如何把相思串。拾起張紙摺隻小船，徐徐地放於水面，靜心閉目許個願，船兒匆匆飄遠望船 ... 。
另一首「分飛燕」，「一水隔天崖」，「浪子心聲」等歌曲，多多少少都表達到別離愁，但對我來講係「自由愁」，個心真係好難過，有時會偷偷滴幾滴眼淚添，尤其啱啱聽見某某同學或朋友走咗佬，我更加愁，個心諗唔知自已幾時先至輪到自已呢。最傷感係嗰首「故鄉的雨」（榕樹下）…一封家書一聲關注一句平常的體已語… … 母親的笑深深記，望著這信淚兒垂，念到故鄉倆老 願似燕子 家鄉飛去…。呢首歌直到我啱啱走出來，每次聽番都喊一餐蒙，無計嘞，感情豊富吖嘛，哈哈。
日日咁諗住走佬，思想附之於行動，所以我哋聚埋就講…「外面」的世界很精采，「這里」的世界很無奈！我同另一個同學仔天真到去堤岸金邊市場搵羅盤，軍用糧食裝備等等，準備行路過泰國。當我哋計劃好嗰陣，我晚晚發惡夢見到被樹蛭吸血，被鱷魚追等等不祥預兆，個心好驚，又唔敢同阿爸媽講，怕佢哋唔俾我去，最後因為同學仔另計劃搭船，所以我哋放棄陸路。如果嗰位同學仔睇到呢一篇文，佢一定笑餐蒙啦！我哋嗰陣好傻，哈哈。
阿爸亦開始四周圍搵路數俾我哋，可惜好多次被人𧦠，失錢不特止，爭機會連命都冇。
最記得有一次阿爸交咗訂金俾我兩個細佬去，點知嗰個騙子帶我兩個十三，十四歲嘅細佬去鄉下一個車站，掉佢哋兩個响嗰度等承日都冇人接，細佬知道被𧦠咗，快快問路搭車番西貢，好險啊！𧦠阿爸嗰個人係熟人添，有句話：「唔熟唔食」，真係應晒！
細佬去唔成，阿爸話轉下運，下次輪到我同我阿妹去，我哋兩個扮醜怪鄉下妹樣，我除開眼鏡盲摸摸咁跟個後生仔去下六省一個鄉村居民住宅等船搭。佢帶我哋坐完客車到坐機動車，然後行路左轉右轉，入住「貨倉」（船客轉接站），屋主係普通居民但聽講佢响本地係有背景人物。我同阿妹等咗兩晚都冇出發消息，第三日我見有人來接觸屋主，兩人低聲細氣，交頭接耳咁傾一陣，然後對我倆姊妹講：「行程取消咗，你哋要自己返屋企，但係你哋住咗兩晚要畀番啲飯餸錢。」我哋吓一跳，點算好呢？返西貢要有車錢，唔可以挮晒啲錢畀屋主，好彩我分開幾份錢抦埋，我快快挖兩份錢畀晒佢，然後好慘咁望住佢講（其實真係好慘啊！）：「我哋整係得咁多，唔該畀我攞番少少錢搭車…」。你知屋主點講嗎？佢話：「我放你哋走就早啲走啦，遲咗冇車返仲麻煩，你哋叫車伕載到屋企再畀車錢就得囉…」。聽佢話放人我哋即刻拿拿臨走到街市搭車，遲一分鐘都有可能就被公安捉。唉！依家諗番真係捏一把汗！好得人驚啊！
我好服阿爸樂觀嘅態度，佢老人家話：「錢財身外物，個人平安就好啦！要信人先至有機會…」，所以係咁今日我仲有命坐低飲啖茶食個包，同你分享呢段古。
係咁多先，下次再見—翠群
No comments:
Post a Comment