翠群四十年回憶錄(十): 解放後新產品(翠群) (11/02/14)

睇番上期寫嘅「懷緬明德小學的日子」，真係感慨萬分！

依家想過番似童年無憂無慮嘅生活，難也！唉！人冇遠慮必有近憂，記得阿媽話偌果隻腳中趾越長就越憂心。註明：係腳中趾，唔係手中指呀，千企咪show出來，不雅也，哈哈。講下笑啫，千怪萬怪，莫怪「細佬女」唔識世界，嘻嘻。

依家繼續講解放後嘅古仔，我記得參加所有課集會之後就開始有通告返學，我哋冇咗越文堂，代替係讀「馬克思列寧主義」書本，我估考試一定會出，所以特別用功讀呢科，果然唔出我意料，bingo，trúng tủ！我好彩過咗關，得到張越文tốt nghiệp cấp 3文憑，可以報名考大學入學試啦。

唔知係唔係受咗影響，我同好多其他同學一樣改變形象，著白色「三婆衫」áo bà ba，黑長衭，有啲激進份子甚至去返學都掛條頸巾khăn rằn，唔知咁扮到時考試有冇加分呢？哈哈！

講到呢度我諗起我嘅至愛係對車呔鞋dép râu，响街市鞋鋪都有擺賣，材料仍然係車呔但款式就靚好多。我著嗰對車呔鞋幾年都有爛，落雨唔滑，行沙灘唔跌，去走佬都全靠佢，的確好嘢！

形象變咗生活習慣亦變，可能人哋窮咗亦或財不可露眼，或者…等等原因，通心菜rau muống ，蕃薯藤rau lang變成主流蔬菜，阿媽都承日買來滾下就食得，唔使煎炒咁麻煩，依家諗落其實咁樣食法好健康，你話係唔係呢？

嗰陣去街市想買啲高檔食物都幾難，聽話政府收購用來出口去蘇聯，唔知真或假？不過就算有得賣都冇乜人買，因為第一次換錢嗰陣，好似係五百舊幣換一蚊新幣，所以身家縮晒水，點敢大使呢？講到換錢都好慘，因為每戶限制換小數額，有錢人四周圍搵窮人幫手換錢，然後分番啲錢畀人哋賺好過被政府收晒，咁要講彩數啦，撞啱好人就攞得番，唔好彩就失錢失埋朋友呢。聽講有人睇唔開攬個夾萬跳樓死！好慘啊！

唔知你仲記唔記得，有啲新產品整係响解放後先開始有，唔記得嘅話…就要繼續聽我講古…呵呵！

越南天氣好熱，幾乎家家戶戶都有雪櫃，出街頸渴就飲雪水，當時雪廠關門，雪條供不應求，做冷氣行業咁就有得撈。冷氣技工好好嘢，佢哋諗到將家用雪櫃改裝凍櫃，做白鐵技工發明圓形小杯用來做雪塊，咁就有新行業「家庭式雪廠」，邊個想飲雪水就過隔籬屋買，方便又實惠。

有生意頭腦嘅人就諗到用改裝雪櫃出產「香蕉雪條」kem chuối，做法好簡單：將熟蕉壓偏，响一頭插入雪糕棒，擺平放入一個細膠袋，然後放硬櫃（冰箱）等結冰就攞出來，將結冰嘅香蕉浸入已備好嘅椰漿，香滑椰漿即刻粘住香蕉冰塊，快快攞出來再灑上花生碎，然後放入硬櫃即成。可用朱古力漿或新鮮果凍代替椰漿。呢款雪糕好味又健康，依家同學仔不仿試做。好啦，你睇咗呢期貼文，咁今晚餐飯有着落囉，大蒜炒青菜，甜品「香蕉雪條」，讚！

係咁多先，下次再見—翠群