點解我咁講呢？因為冬天嗰陣，天寒地凍，夜長日短，人人懶出街。春天就唔同啦，鳥言花香，天氣好，心情靚就諗到攪娛樂，所以最近連續兩個週末都有人請去參加「BBQ派對」，大飲大食大笑之後，就冇時間坐低飲啖茶食個包諗番陳年舊事啦，吉如亦難得耳根清靜，唔使聽我講廢話，但係…同學仔咪高興住，因為我仲未想收「滑鼠」，今日再上吉如重操「鍵盤」，你依家有排受啦，哈哈！
首先我要多謝瑞娜幫我提供舊相片嘅資料，連阿萍個別號都仲記得，阿娜好嘢！咁我就講下明德小學嘅古仔當係成我諾言，好嗎？我冇可能記得晒咁多嘢，所以淨係講印象最深嘅事就算數囉，如有錯誤，同學仔要幫手補充啊。
上期講好多私人嘅嘢，好悶！呢期就講下大眾事來換下氣氛吧。我嘅專長係「吃喝玩樂」，又咁啱去咗參加大盛宴，咁就由「吃」開始講古啦。
最記得响西貢明德小學門口有幾檔常駐小販，一直到我哋初中畢業都仲有擺檔，最好生意係賣「雪水」嗰家人。佢哋架推車擺滿大玻璃罐，可以見到清涼碧綠嘅海帶，一粒粒黑白嘅hột é，五顏六色嘅bánh lọt，紅豆冰，綠豆冰，等等…若果有多零用錢就食一杯高級D嘅圓肉冰，少錢就食杯紅或綠色嘅nước đá bào sirô（糖漿刨冰，shaved ice syrup）。賣雪水個阿姐好聰明，佢用一隻割咗底嘅膠杯做漏斗，擺入個細膠袋里面，咁樣呢糖水唔會週圍漏，又快又乾淨。我最鍾意企近刨雪機，雪花四周圍飛，灑落面即感到涼滲滲，好舒服。另外幾檔長駐明德係賣煎糕（炒kwoe），賣bò bía，對於嗰陣嘅學生仔來講，煎糕bò bía都係超高檔食品啊。
記得仲有一檔賣黑涼粉，一見到嗰位阿叔啱啱開檔，我就一定幫襯買新鮮出爐熱辣嘅涼粉皮，遲咗就冇晒。嘩！啲涼粉皮滑中帶韌嘅口感，甜甜甘甘嘅味道，百分百正料，讚！後來唔見咗佢，聽講佢被捉軍役，希望佢平安冇事啦。最後應該係賣牛肉乾木瓜絲嘅阿伯，佢响明德擺檔都幾耐，爽脆嘅木瓜絲加啲香菜，佢用交剪剪啲甜甜咸咸，又腍又爽口嘅牛肉乾，擺响木瓜絲上面，最後淋啲醬油，啲醋，辣椒醬…甜甜酸酸木瓜絲，真好味！但係…諗番佢用來洗碗嗰桶水，睇到啲不明物體响水桶里面飄下…飄下…就冇晒胃口啦！不過正所謂「大菌食細菌，細菌當補品」，唔洗驚喎，到依家我都冇事，嘻嘻。
講到老師，我最記得係上童軍操兵練習嗰陣，銀雞聲（哨子）同腳步聲，好整齊好有韻律咁響「一二一，一…一二一…左右左…，向右…轉…」，我哋每次都要操到腳步冇錯，到老師滿意為止先至有得休息，正式係體力訓練課程，全靠咁我哋先至入得廚房，出得廳堂，你話係唔係呢？
因為初中係女校，所以小學畢業之後全部男同學都要轉校，剩番我哋女生仲更加好玩。音樂，体育課係我哋嘅至愛，因為唔洗做功課吖嘛！响我印象中幾乎所有音樂老師都係好斯文，好溫柔。小學嘅音樂老師亦係咁，我記得佢係校長嘅女，啱唔啱呢？嗰陣流行姚蘇容歌曲，我哋一得閒就來個大合唱，妳一句我一句，未識得愛係乜東東都學人大聲嗌… 「…我悔恨，我悔恨，我悔恨對你癡心 啊..負心的人…負心的人…」，哈哈，好過癮！
我參加初中籃球隊嗰陣，曾有一場籃球賽至今難忘，好似電影一樣咁刺激。嗰場係我哋第一次邀請越文學校「嘉隆女中」參加嘅友誼賽。嘉隆女籃隊實力雄厚，經常出外競賽，我哋都冇把握贏，個心諗希望冇輸得咁慘就好啦。嗰日比賽，我除咗副近視眼鏡，朦查查咁同隊友愽命又攻又守，就快夠鐘嗰陣，嘉隆隊領先我隊一分，好緊張…好緊張嗰陣…阿碧雲啱啱搶到個波，佢輕輕一跳，雙手舉球遠射一下… …（翠群導演慢動作，哈哈）…個波慢慢…淩空飛…噗一聲…入咗籃內，嘩！觀眾由靜止狀態突然間大聲歡呼，拍手！球證吹銀雞beepbeep幾聲表示夠鐘，比賽結束，我隊險勝一分，之後碧雲變成明德小學家知巷聞嘅籃球明星。所以話齋，佢細細個就已經展示出動人魅力，超酷形象啦！
好懷念嗰陣無憂無慮嘅日子，呢期嘅吹水標題特別寫畀同我一齊成長嘅同學仔分享，我好掛住你哋，希望大家永遠幸褔安康！
係咁多先，下次再見—翠群
No comments:
Post a Comment