第六次計劃失敗
今次都唔算係失敗，應該係俾越共政權跣獲甘！擺個局等我地上釣，神又係佢，鬼又係佢，嚡！攪咁多次都去唔成，對自己冇晒信心，但離開越南嘅決心就有加冇減，有朋友話有條好路數，就盅個頭埋去。
經朋友推薦搭咗一條坐咗三個月，都出唔到海嘅監倉船，(Nhà Tù Phan Văn Lu) ，咁又唔怪得我朋友，佢有個大佬真係搭呢支水到咗馬來西亞喎！有相俾我睇，有相為証添，點會整蠱！哈哈今次冇死囉！係胡志明市公安局(Công An Thành) 組織，係亞頭攪，仲有邊個夠膽去捉呢。
嗰晚大約六點，有部公安車到家門口接我，及今次介紹我去嘅朋友，車上幹部仲用通訊器通話，呢次點會錯喇！之後送我們到Cầu Chử Y一處河邊排屋，有人員帶領入內，全程明目張膽，今次我仲唔係執到寶，入屋坐咗一陣，就有人帶領上一艘大木船，所有人落晒船倉，聽講話送出大船，船行咗一段時間，响船倉內根本唔知外面發生乜事，突然聽見有警號聲，接落嚟有碰撞聲，今次仲唔仆街，跌落陷阱，公安大聲嗌，全部企埋一邊，通通帶上手銬，上岸時，岸上己經有幾架大巴士等住，一早就擺好個局，吹咩！願者上釣。
從Kho 18送到陳興道嗰間Công An Thành，相信都有200人，辦好手續就俾送到Bà Triểu 駙馬廟附近一個監獄Nhà Tù Phan Văn Lu 。人到監倉，倉友問，你係唔係搭乜乜人支水，先知自己俾政府設局，我都算唔好彩，我呢批係第七批，同時亦都係最後一批，因為我之後再冇偷渡客進脹。
今次真正受牢獄之苦，足足三個月，每日兩餐，饅頭，加咗鹽嘅雜菜咸湯，都算夠運，監獄內，唔似香港做戲(監獄風雲)咁得人驚，但冇香港做戲監獄內有活動，呢度日日都被困响個監房內，每間都有五十人，晚上瞓响地上，好似沙丁魚咁，啱啱夠一個人位，好彩所有犯人都係智識份子，商人，學者，教授，政治犯，個個有學問，同埋呢七批偷渡客一齊，所以大家相處都幾好。在同一倉內，亦認識到日本教師，吳其照先生(寫法唔知啱唔啱，但讀音相似) 吳老師教識我下圍棋，我好感激佢，多謝佢，為咗要教我圍棋，不惜每餐犧牲半個饅頭用來做圍棋棋子，黑色棋子是用香煙灰同饅頭磋成。
同倉亦遇上當年鳴遠高一時教我們越文之男教師，(唔好意思，唔記得佢叫乜Sir) 我晚晚求佢講返當年佢教嗰段文學， LỤC VÂN TIÊN THÚY VÂN THÚY KIỀU. ，但佢又有個條件要我唱返首歌俾佢聽，嘩！原來佢好中意聽「千言萬語亅。
在我食皇家飯期間，外面世界變得如火如荼，可能設局捉到我呢批，監倉有人滿之患，所以開始攪半公開，直至有日公安部通知我家人，要交黃金做按金，仲要向某組織登記，參加公開偷渡，先至放人。我地班犯人响裏面仲懵閉閉。有一日叫名集合，我心諗，今次唔知送到邊度做苦工勞改，用車送入Chí Hòa。( 曾經聽人講，智和監獄建築好似八卦陣，入咗去，冇人帶路真係唔識出)。兩日後我獲釋，但要簽返張保証書，一定要離開越南。
No comments:
Post a Comment