離開八公會館都有一排，唔想日日發吽哣，今日心思思都要篤返幾行字嚟趁吓熱鬧，我哋呢班寄人屋簷下嘅越南華人，真係要多謝共產政權，如果唔係佢變天，我地都仲係受歧視，都仲係俾人叫"Ba-Tầu"。其實呢個稱呼都冇乜野，但聽落總係好刺耳。都要拜越共所賜，我哋先至有今日自由，美好，安穩生活，但得到呢啲，我哋真係付出好沉痛嘅代價，為咗自由，不惜受牢獄之苦，犧牲性命，狂奔怒海。
我一生中，自出世到鳴遠高中畢業都係過着無憂生活，食爺飯着乸衣，申手錢到，之後雖然初到澳洲時身無一物（哈哈！唔係光禿禿嗰種，都仲有塊布遮著）三餐都溫飽，三十多年嘅今日家庭環境都算過得去，比上不足比下有餘，所以講落都要感謝上天，賜我呢幾十年有個平穩人生，無憂無慮，但其中最刺激最驚險最艱苦都係76至78年呢段時間，雖然短短兩年，呢段日子帶俾我無數回憶，呢啲記憶太深刻啦！想Delete都唔得，就係一幕千方百計，千辛萬苦逃離越南嘅過程。
之前我有提及，自越南南方淪陷後我一共逃走七次，其中三次被捕，兩次入獄，所有不幸事情發生，好彩唔似茶包女俠所講，每次都係遇上無良騙局，去唔成兼失金錢，分分鐘食皇家飯。每次偷渡行動策劃雖然我係冇份參與，我只係個傍聽者，騎呢啡一名。所以一切事情發生自己知道一清二楚。無奈失敗都係天意，真係謀事在人成事在天，命運安排冇得改變，自從呢七次經歷，改變我人生觀，我相信人嘅命運冥冥中早已註定。命裏有時終須有，命裏無時莫強求。
偷渡，唔駛講我哋呢班船民每一位唔多唔小都有佢個人嘅經歷，受苦，驚險，傷亡，逃難過程每位都唔同，只有當事人先知其身處境嘅苦澀。好多人講，過去嘅事，仲記嚟做乜，我就覺得唔係，呢啲都算係自己人生一個階段，死裏逃生，咁辛苦換番下半生自由，安穩生活，應好好珍惜，常常提醒自己今日存在，係當年用條命換番嚟。
一個錯誤決定唔跟隨美軍走佬，西貢淪陷後，初時太天真以為戰爭結束會有好日子過，慣咗生活在一個自由世界，突然轉變到一個鐵幕黑暗嘅共產政權下生活，唔駛多講太家都一清二楚。
 |
| Khu bao ton thien nhien Binh Chau 係當年森林, 係成個森林，當年就係要穿過去，先到Hồ Cốc海灣，依家有條路叫 Ven Biển，以前冇架。 |
為著避免打資產被送到遍遠新經濟區，唯有自發在近西貢買農地從事生產，跟隨我三家姐外家在村木"Xuyên-Mộc"(唔好攪錯"Xuân-Lọc",兩個音好似，Xuyên-Mộc係位於Long-Hải與Phan-Thiết之間,Xuan-Lọc係去Đà-Lạt方向）買農地耕種，從西貢向頭屯方向，到Bà-Rỉa轉車經Long-Hải過Đat-Đo再到達一個小市鎮叫Xuyên-Mộc 若繼續前往，尾站叫Binh-Chau。離Xuyên-Mộc市鎮步行大約大半小時有個小村莊，莊內有六戶華人聚居全係芒佳人仕，每個家庭都以農作生計，所有人之農地離村不遠，農地之後就係一片森林，我家就在該處買了幾畝地，種植花生，綠豆，(慘！估唔到呢個二世祖淪落到要楂鋤頭，冇計：馬死落地行)。當時社會環境，交通好唔方便，從西貢去村木要轉幾次車，班車次數又小，每次出發都要一早出車站，雖然離西貢百多公里路程，都要花上大半日時間，事關當時路途上設有好幾十個檢查站，每經過一個地方區域就有一個檢查站，所以出外時一定要到自己居住嘅公安局(CÔNG AN PHƯỜNG)申報下鄉務農，要有行街紙，逐站俾嗰啲豆丁所謂幹部檢查，都唔知佢識唔識字，細佬仔持住有支槍，作威作褔 。
西貢村木兩邊走，係咁就捱咗半年，直至77年頭將到農曆新年，我嘅逃難生涯開始啦！...(下文待續)
No comments:
Post a Comment