澳美加，各花入各眼 (07/25/18)

(作者: 羅偉銓提供)

美國---我一共去咗四次，頭一次係為我大家姐奔喪，第二次參加旅行團，美國東西兩岸及加拿大旅遊，第三次出席鳴遠第十二屆四十週年聚會，順道加勒比海郵輪之旅，今次第四次，係參加外甥之兒子婚禮，講起上嚟，我嘅輩份都相當高，俗語有話，天上雷公，地下舅公，可惜嗰啲ABC(American Born Chinese) 講廣東話唔多正，分分鐘叫我做狗公！冇計啦！狗公就狗公，都要接受。

今次除咗參加婚禮，咁遠水路，捱咗十幾個鐘頭飛機，梗係唔靜止停留三番市，湊啱學校放暑假，另外一位外甥家庭，趁機會同佢再去紐約，華盛頓及多倫多一行，雖然八年前第二次到美國跟旅行團去過紐約及加拿大等地，但所有地方都好似青蜓點水，走馬看花，根本都唔知當地真正面貌，好彩當時唔理得咁多，嗱嗱啉用部機錄低晒，回家番睇都知道係乜。

今次再重遊舊地，自由行，當然景點就冇參加旅行團去到咁多地方，因交通問題，只有選擇幾個出名景點參觀，今次响紐約我倆夫妻得償所願，當年參觀自由神像，淨係坐船經過，想影張靚相都好難，因船上人太多，想攞個靚位都幾難，船航行離自由神像鬼死咁遠，斬吓眼就過咗，今次就唔同喇，外甥一早就訂好票，卒之可以踏足自由神像內，足足爬上196梯級直達頭頂內部，從頭頂小窗遠望紐約市全景，雖然過程艱辛，因梯級垂直同埋好狹窄，能親歷其景，辛苦都值得。

第二個享受係時代廣場，當年旅行團只限停留半小時，影得相嚟都欣賞唔到四周環境，今次就唔同啦！住嘅酒店就响附近，得閒就出去蒲，尤其晚間，燈光五彩繽紛，享受熱鬧氣氛，真係樂而忘返。

除咗紐約，下一站係多倫多，亦係我倆難忘回憶，呢次到訪目的係與我相識五十多年嘅結拜兄弟妹(鎮國，燕萍，惠蘭)相聚。記得八年前隨團到訪，我們相聚只得三小時，個樣貌都未望得清楚又話離開，真係冇癮。

今次非常多謝各位弟妹多日陪伴，晚晚長談至深夜，正一雞啄唔斷，正所謂想當年嘅事真係講唔完。

另一個喜悅就係能夠與多倫多鳴遠同學見面；當晩由楚楨，鎮國及諸位同窗好友設宴歡聚，多年不見大家特別高興，真係多謝每一位同學和朋友之熱情。並於翌日有緣與小鳴鳴兄品茗暢談，不亦樂乎！

在機緣巧合下，亦得到楚楨同學帶領參觀多倫多律師公會大摟，憑佢嘅身份，先至可以帶領參觀及深入大樓內部，大律師會議室，法律藏書閣等等，真係難得一見，不枉此行，見識一番。

回歸三藩市參加婚禮，然之後剩番幾日時間，事關親人眾多，所餘時間都唔夠分配，所以非常抱歉未能抽空與一等同學見面，某日有咁啱得咁橋，在San Jose某間餐廳遇上劉德智同學，我們大家都只是閒談數句，問候就離開。其實此次到美，目的不再是觀光旅遊，皆因主要城市之名勝之前都曾到訪，雖然只短暫停留，雞咁腳就走，都算係踏足過，所以今次嘅心境重要都係與親朋相聚。

在三藩市參加婚禮後停留一星期，除咗瘋狂買名牌，衫，鞋，(因澳幣對換美元太低，所以價格都唔係幾化算，咁遠水路嚟，大出血都冇所謂，肥佬着笠衫，幾大就幾大，瘋狂掃貨，來時兩個喼，走時四個喼，都係要有番啲收獲) 。

最開心都算係得到肖恩大哥指導，學識在錄影片製作過程，需要加插字幕，音響，效應等等，不溜呢啲係我夢想知識，雖然係手板眼見工夫，無奈我苦學無門，依家有高人指導，挭係即刻拜師，非常非常多謝芯蒂之丈夫肖恩耐心教導，短短大半小時將重點一一傳授，真係天堂尿壺，全神貫注，怕學漏咗就弊！

第二件事係得外甥帶領參觀世界第一科技城Google總部，難怪Google科技超群，皆因公司對待員工褔利難以至信，唔洗多講，淨係一日三餐免費供應，康樂設施，都足夠使員工有歸屬感，替佢賣命，其它好處都唔使提，故此很多人都想成為Google一份子，但想躋身其中，並非易事。

好啦！我多次到訪美國，加拿大，我本人有一個結論，我始終認為生活在澳洲比美國加拿大好，點解我咁講呢？我講出嚟等大家討論吓，首先我所提出祇係我個人睇法，同時每個地方有當地嘅生活習慣，每人觀點不同，或者我個人生活太簡單，所以先至有咁諗法。若將美加與澳洲相比，無可否認，澳洲在每一方面都比美加落後。之不過生活上我就覺得澳洲比美加舒服得多。

1：美加不論貨品，餐飲，所標明價格，還未加稅，固然之口袋裡要有額外金錢找數。澳洲就唔同，明價明買，標幾多就俾幾多，唔洗心算加咗稅後夠唔夠錢找數。

2：美加日常生活，有人替你服務就要俾小費，食完野埋單仲要計吓俾幾多tips，連tips連稅，總數直頭又唔同咗，澳洲就冇呢支歌仔唱，價錢寫幾多就俾幾多(內已包含消費稅) ，小費隨人，查實可有可冇，沒條例限制。

3：美加地大人多，地區發展迅速，最差係公共交通不完善，唯一解決交通就要開車，就形成高速公路上塞滿汽車，終歸交通成一大問題，我發現美加有句口頭禪每當我發問，路途多遠，差唔多第一句回答我就係(如果唔塞車) ，真慘！每日浪費唔知幾多時間响馬路上，唔單止咁，仲有樣要提醒我，要去咗廁所先至好上車。仲有最為誇張係，每方行車多達六條行車綫都塞車，唔親眼見都唔相信。澳洲就小有呢啲事情發生。

4：在閒談中，得知原來美加屋稅咁驚人，直情攞命，每年按照屋價百份比交稅，屋越貴，交越多稅，分分鐘過萬，真係揾小個鏰都唔掂。澳洲買屋，稅只係當成交時一次過納(印花稅)，然之後每年只交地方市政費，每年千多澳幣(內包含垃圾費，公路維修，學校，街燈等等)。若係退休人仕仲有折扣㖭。

5：國民醫療，我冇太深人研究，但美國總統也曾講過，澳洲國民醫療做得非常好，不論貧富，無業或在職，祇要係公民，或獲永久居留，若到公立醫院求醫可獲全部免費，當然在職人仕每年報稅時年薪中抽取百份之二作為保健費。但凡到私人診所求醫，化驗，眼科，等等政府都有補助，之不過呢方面亦有弊端，事關到普通醫生診所求醫，大部份診所只收政府補助金，不收額外費用，于是乎傷風頭暈芝麻綠豆小小事都要睇醫生。當然，如果要特別醫療，自選專科名醫，私家醫院，咁就要額外投保。

我承認，美加物資享受比澳洲好得多，任何用品質量都優美，我大膽借用一句，酒是故鄉醇來形容，我們各人，美加又好澳洲也好，大家居住當地快要半世紀，一切生活都成習慣，順理成章，落地生根，對本土有一份歸屬感，不論美加或澳洲，能安居樂業，都要謝上天所賜。