真係好耐好耐冇响吉如同大家吹水。今日趁有機會同大家八吓。可能有人話，車！咁耐唔蒲頭，一出嚟就响呢處講呢啲野，好唔老利啫！大吉利是！但我本人就好睇得開，百無禁忌，呢啲係大自然嘅遊戲規則，冇人可以豁免，唔理你係一個普通人，又或者你係名人偉人，達官貴人，通通到最終都要行同一條路，冇得走雞，無人幸免。
澳洲悉尼明月居士林足足用咗兩年多時間，加建地藏殿，廚房，餐堂，我本人就負責攝影工作，從吉地動工開始一直至完工，每次有新建築我都一一影低存擋案，終於上個月完工，及舉辦隆重開光典禮，同時亦開始發售神主靈位及小屋子(骨灰位)。
早前我有同太太傾閒偈，如果它朝我先走，將我化灰落海，(哈哈我要放在悉尼最出名之海灘，最低限度夏天熱鬧，又有美女，做鬼都唔會寂寞) 但我太太反對，諗落大海真係好可怕，又其喺晚間，好多次座郵輪都體會到，白天非常靚，望着大海，一望無際，平靜的海浪，真係胸襟開朗，但一入夜，漆黑一片，浪花打上船身，有如鬼怪叫喊，好可怕。有一次我單獨一個人在船邊走廊長櫈休息，成條走廊冇人來往，只有我單一人足足半個鐘，燈光又灰暗，真係越坐越心慌，對出海面黑漆漆，海浪聲一個接一個打上船身，入夜海風亦帶有點寒意，越坐越心寒，心諗都係返入船內大堂比較熱鬧得多。四十年前逃奔怒海，都嘗試過，但當年為咗自由，乜都唔理得咁多，唔知係唔係依家條命唔同咗，所以都有些小怕怕。
好啦講返轉頭，老婆大人唔中意塵歸塵土歸土，唔想灑落海，為有先買間屋仔(骨灰位)，等它日有個好歸宿，趁佛堂啱啱開光同時開始賣骨灰位，又有首期發售特價，唔好執輸，嗱嗱啉，咁就約埋一班義賣組義工朋友齊齊揀番個好位，大家將來做隔離鄰舍，有熟人唔會悶，到時齊齊開party 。
我本人唔係一個虔誠信徒，入佛堂做義工只係開心，有一班義工朋友傾吓講吓一樂也，所以神鬼我都唔多信奉，只係跟隨俗例，入教堂祈禱，入廟就拜神。暫且唔好講結束後上天堂或落地府，每個人最終都要有一個處理軀殼方式，各有不同，為咗將來子女易辦事，同時自己又可以親手選擇將來自己之歸位位置，一切都由自己意願，未雨綢繆，我與太太就落咗呢個決定，開心面對，咁就選購一個中等價錢之心水位置，以後心中無後顧之憂，安樂晒，哈哈。
願祝大家，大吉大利，長命百歲，身體健康。偉銓。
No comments:
Post a Comment