 |
| 靚夫婦Becky ＆Peter |
Peter夫婦於星期五，十二月二十五聖誕節日下晝四點到達市區酒店，咁啱亞坤（我嘅先生）放假就同我約埋立美一齊去見Peter，Becky倆人。靜敏住响墨市西區，我哋約佢七點响餐館見。講返以前我家人去布里斯本旅遊嗰陣，亞坤曾見過Peter，所以都幾好傾。就算未見過都無所謂嘞，因為佢都係讀「愛」班，即係愛他（她）的班！呢句話係Becky講嘅。事關當我哋介紹自己嗰陣，佢話佢讀愛班，我以為真，原來係「愛Peter嘅班」！好嘢！我好鍾意佢呢句話。我哋嘅partner應該全部都係「愛班」，咁樣就可以發揚光大鳴遠精神嘞！
 |
| 由左至右靜敏，Becky，Peter，立美，翠群，亞坤 |
响酒店大堂坐咗一陣，立美載我哋去富市克Footscray越南餐館同靜敏會合。本來想試食另一間好出名嘅餐館，可惜冇開門，我哋局住要去响以前請洪輔蔚食過嗰間餐館，重要五點過後先至開門。嗰日多數飲食行業休息，算係好彩嘞！嗰日天氣好熱，靜敏一早就到餐館歎冷氣，好疏乎！我哋呢次叫幾式出名嘅越菜，Bánh xèo，越式Chả giò，Bánh đập，Bò Lá Lốt ，Bún chả cá ，Gỏi đu đủ bò khô。節日氣氛加美食，老友鬼鬼加回憶，配到絕！所以我哋天南地北咁傾到夜，先至發現原來Peter同靜敏係小學同學！靜敏仲有以前嘅舊相，真係好巧！靜敏應承下次聚會就帶相片來俾Peter睇。
 |
| 越式Chả giò |
飯後靜敏自己返屋企，立美送我哋返墨市中心。墨市政府出通告話聖誕節日以及元旦所有公共交通，路邊迫車都一律免費。立美响Peter嘅酒店附近搵到個靚位迫車，好近唐人街，所以我哋決定遊夜市。街道雖然比平時靜好多，但係响唐人街就一樣咁熱鬧，而且越夜越多人。多數係啲靚妹靚仔雙雙對對或成群結隊漫步街頭。一時間你會暫時忘記啱啱响墨市北區發生嘅山火，忘記紐省嘅水災,昆士蘭嘅旱災...而會覺得生活都幾他條，世界都幾美好...好似谭詠麟一首歌「雨夜的浪漫」…忘掉了以往痛苦的失落…Fantasy 享受现在 这滴下雨水（係霧水就真）哈哈！我哋行到腳又軟口又渴，可能食咗魚露或味精或者天氣熱？總之我哋要搵地方坐低飲杯珍珠奶茶，然後繼續倾偈…唔知唔覺咁就一晚。立美第日仲要返早班，真係好多謝佢載我同亞坤返到屋企，你話咁嘅同學仔去邊度搵呢？
 |
| Bún chả cá |
第日星期六係Boxing Day，商店一年一度大賤賣Sale，Peter夫婦想体驗一下墨爾本人嘅購物有幾瘋狂，佢倆人自己搵節目。星期日佢哋又約咗親人聚會，咁我哋就約星期一再見面嘞。星期一立美，靜敏，亞坤要返工，剩返我一個做導遊，我當然要帶佢哋去試下搭墨市火車，電線車以及參觀天然景色嘞！簡單，樸素，正式係鳴遠精神「真善美」！你話啱唔啱呢？
係咁多先，下次再見— 翠群
 |
| 响墨市唐人街歎珍珠奶茶 |
No comments:
Post a Comment