近排唔知係唔係行正食運，又或者行正收紅炸彈運，呢排密密上酒樓，唔係結婚娶新抱，就係嫁女喜酒，唔係乜乜佛堂理事就職，就係乜乜同鄉會，乜乜同學會慶祝週年晚宴，唉！俾啲紅炸彈炸到一身血，大出血好傷荷包，唔去又話唔俾面，攪嚟攪去都係益晒啲酒樓，都仲好彩，其餘所有乜會物會慶祝週年晚宴都係有人邀請，唔駛出錢，荷包都冇咁傷，算落嚟都係打個和啦！我講出嚟好似好市儈，係嘛？
講咗咁多都仲未同大家傾吓天下事，其實呢啲事响我哋亞洲人都好普遍啫！但最近我發現呢種行動會帶嚟乜野訊息，好與壞？攞出嚟大家研究吓！
我個人發現一般宴會如果設宴於中國酒樓，從人客嘉賓開始入場至散場，場面都係嘈寃巴閉，成個街市咁，呢個情況不溜都係咁，好難免，好友咁耐唔見，咁啱湊埋一齊，梗係好多野傾，最慘係，台上有台上講，台下有台下嘈，直情當主家發噏風，睬您都儍，大家一齊鬥大聲，好彩台上都仲有個擴音機，唔係嗰啲有心想聽嘅貴賓，都唔知主家講乜？
婚宴都比較好啲，主人家致詞全場都會靜番小小，社團宴會就慘，你有你演說，我有我雞啄唔斷，話知你。
哈哈！最近因為上得酒樓多，原來酒樓出咗新招，條橋都唔錯喎，場面都有啲改善，點呢？開場嗰陣有幾位侍應高舉個告示牌，在酒席間行嚟行去，牌面大大個字『肅靜』『QUIET』大家點睇，婚宴都仲好啲，嘉賓都仲會聽話，場面都會靜番啲，至於社團宴會，就話知你，個牌行到我面前，就收斂吓，行開咗！又嘻哈大笑，車天車地。最弊社團攪慶祝必定請埋啲政府高官，俾啲鬼佬睇見個告示牌行嚟行去，你話外國人點睇我地，我們亞洲人跟本唔識自律；同埋尊重主辦人，怪就怪呢啲情況靜係發生响唐人酒樓，如果婚宴設响西人RECEPTION 就完全唔同，個個都好守規矩，當台上有人發言，唔靜止賓客連侍應都企埋一邊暫時唔做野，全場靜一靜，氣氛非常嚴肅，做乜我哋又做唔到呢！
世間上真係冇十全十美，有呢樣就冇嗰樣，婚宴擺响西人酒樓後生年青一輩就好中意，年紀大一輩就唔多LIKE，食唔慣西餐，又食唔飽肚，都係中菜好味啲。
做乜中式咁放肆，西式反而收歛。真係冇解！
====================================================
11/07/15, 應路人乙要求, 老羅補充舉牌場景四張如下:
嘩！真是匪夷所思。很難想像得出餐館內的服務生舉著「肅靜」牌子在客人面前幌來恍去到底是什么樣的場景？可不可拍張照片分享啊？
ReplyDelete路人乙兄台有興趣睇吓高舉告示牌場景，現送上相片，希望沒有開罪他人。
Delete多謝分享！嘩！澳洲人真係夠哂文明囉！今次真係開哂眼界。話之真係好滑凸。冇眼睇！
Delete聽橋。
唉，觀看古裝電影，劇集，歷代大官或皇帝出巡，都帶備大隊人馬，浩浩蕩蕩舉著“肅靜”“迴避”的木牌遊行大街小道，目的是怕場面凌亂，刺客容易乘機出動。那現在居然發生於時髦的酒樓茶肆間，還要勞動侍應服務員，對賓客可是大大的沒面給，幸好讀完全文後，才知道原來是那些社團的宴會。
ReplyDelete為什麼偏偏在這類活動中發生，還要是唐人酒樓﹖而各席之間被邀請的賓客，都互相不認識﹖探討其原因，這是社團發動慈善募捐的活動，與唐人酒樓生意合作(價錢比西餐來得便宜)，要商家贊助部份宴席，為免浪費，他們只好把飯票分給朋友親戚去捧場，試想大家都是來代食，你們社團的事，事不關己，己不勞心，我們有食有講，不亦樂乎﹗糟糕的是社團單位肯定有邀請達官貴人，演講之時，自然會用這一招，下面的賓客不是用來湊數嗎﹖免費晚餐要受一點委屈了﹗不好意思，對事不對人，說溜了嘴。
不怪兄：哈哈，好一句事不關己，己不勞心，所有有頭有面嘅，都係嗰班台上發噏風嘅主辦人員，出晒鏡，我哋係陪襯品，關我哋屁事，所以呢句好啱聽。
ReplyDelete話雖如此、既然出席宴會，是否應該尊重台上發言人，若大家懂得禮貌，酒樓就唔需要出絕招啦！
咁又好難怪，可能啲演講者，演說技巧差，冇吸引力，又或者長篇大論，廢話連篇，聽到悶晒，若大會轉吓話題，話有大禮物送，人人有份，擔保全場蚊飛都聽到，嘻嘻 ！有小小誇張添。偉銓
羅師父觀察能力入微，連靠邊站的人肉警示牌也盡入天眼，佩服。猜想他們必是為遠離的宴席人士而備，百桌的盛宴，排位時已經構成尊卑級別，重要與不重要的區分，離得遠的賓客，在盛情與酒精推動之下，嘈吵在所難免。我個人認為酒樓方面應該檢討本身的擴音系統，維修或換新，或者用另一種喚人注意的燈光方式，以確保每一個角落的賓客，都可以把注意力重返大會主持人身上。抽奬禮物嗎，不是更添吵閙？
ReplyDelete不怪兄：
Delete非也，非也，當大會宣布大抽獎，全場必定靜落嚟，人嘅本性就係咁，有着數，有利益，又點會放過，傾偈？等陣先，細心留意有冇叫到自己大名，又或者叫到自己票根號碼，點會執輸呀！
羅師父呢個稱呼，小弟真係擔當唔起，我文『聞』又唔得，武『舞』又唔得，正一屎坑關刀，叫我老羅吧！
是的，老羅，羅總，不是每個人都要有神馬(什麼)關刀，去文啊武啊，才可爭一席位。最要緊靠把嘴，一樣講得才是出神入化﹗究竟您發現多少間有此種裝備的酒樓，落人話柄呢﹖
ReplyDelete中國人老一代的習慣，要改變可不是一朝一夕的事，不過仍然保存著很多美德，是文化的影響耶，謝謝分享。