農曆新年期間，到寺廟幫手，忙咗幾日，今日得閒上吉如八番陣，首先向各位拜個遲年，其實都唔算遲，仲未過新十五，都仲係過緊年，咁就祝大家，有個美麗既祝福，祝您羊年舞出好彩頭，生活有綽頭，一切順利灑滿好兆頭。
今次八啲乜呢！趁過年過節大家都會斬吓叉燒，燒肉，咁就八吓啲無良燒臘店。(唔敢話所有燒臘舖都係無良，可能有一部分店舖，係我唔好彩遇上) 。大家有冇遇上都好，就借吉如站吹吓水。
呢個現象我好早之前已經發現，亦有同親戚朋友提及預防，今次真係抵唔得要開口同大家八吓。
就前幾日，過年之前佛堂義工組私人組織聚餐，食物當然係多元化乜都有，除咗春卷炒粉麵外，梗係唔小得我哋中國美食燒肉叉燒燒鴨，又方便，又好味，咁就派倆位精明大姐負責去買。
哈哈到開餐打開個盒，發現貨不對版，多咗好多肥豬肉，呢倆位大姐出咗名挑剔，點會揀漏眼，佢地話明明揀件好靚，又見佢斬件，點解返嚟完全唔同，哈哈！我唔知美國，加拿大，及其它國家嘅燒臘舖係點，澳洲就大多數燒臘舖個砧板都係對住客人，上面仲加塊鐵板圍住，啲客人根本睇唔到砧板有乜，掛上架嘅叉燒，燒肉，通常都裝飾靚靚，去肥肉，去燶，將切落嚟唔靚嗰啲就放响砧板一邊，等有條水魚嚟話斬叉燒，燒肉，(因叉燒，燒肉類係以重量計算) ，就順手撥多幾嚿肥油俾您，將唔靚嘅野一齊稱賣埋俾個客，食客若冇留意係會唔多覺，以為自已走漏眼，揀錯添！
買燒鴨燒雞就唔怕叫佢斬件，因逐隻計，除非刀手想留番幾嚿今晚燒夜，咁就好難講啦！分分鐘會撥開幾件留低，我地都睇唔到，仲有如果呢間燒味舖有設堂食，賣燒味飯，咁就唔同講，分分鐘俾佢斬件，隻燒雞燒鴨可能小緊件都唔出奇。所以自已唔想拆穿得罪人，又唔想俾人揾笨，辛苦啲買番屋企自已斬，買叉燒燒肉時就同佢講，老細俾K叉燒或燒肉免斬，我返去拜神，佢聽落唔會懷疑，我又開心。至於買燒鴨燒雞就唔會幫襯有設堂食舖頭。大家不防留意吓，睇我講得啱唔啱。
嗰日我影呢批相時，刀手見我企响嗰個位置，佢立即將啲唔靚嘅肉推埋一角，又或者將把刀遮擋住。
看官若買燒味唔介意小緊件，又或者多幾件肥肉，就當我寫呢篇野係發噏風好啦！偉銓
響加州的燒腊舖頭, 間間都有咁架設備。原來如此！真係天下烏鴉一樣黑。
ReplyDelete多謝大俠分享防詐經驗之談。
這是大部分燒臘店的做法，只因燒豬的一部分太多油的部位，和豬頸肉是沒人要的。
ReplyDelete他們的做法就是把那些部分，逐漸分散混淆到顧客所指定的部分裡賣出去。
除非是和店家相識，不然就要告訴店家「唔使斬」，回家自己處理就不會上當了。
Người đẹp Cali
不然多打籃球，希望改善身高，可以伸頭看到內裡乾坤，記得要帶眼鏡哦！老板應該知道，肥肉還有很多用途，沒有魔術師的身手，在快刀亂斬的情形下，留下自己的手指，後悔莫及也﹗
ReplyDelete奇怪﹖這種作風的燒臘店，還有人“幫襯”，是半價嗎﹖
水魚
冇法，幫襯都因為佢嘅燒味好食，咁自已就要醒啲，佢有張亮計我有過牆梯，除非佢呃秤，我就輸晒。我都曾經申個頭去睇吓鐵皮後有乜，但俾刀手鬧一餐，話把刀冇眼，哈哈！都係唔好阻人發達，响吉如八吓好啦！
Delete