翠群四十年回憶錄(八): 鳴遠以後的日子(翠群) (10/03/14)

今日得閒坐低飲啖茶食個包，好想寫啲歡樂嘅事，但係諗來諗去，講古到呢個時點，好似冇乜嘢喜興事件發生。

睇番上期我提到阿姨媽，今日我又諗起阿姑媽，我哋細個嗰陣，每逢週末都好鍾意跟姑媽家人去佢哋鄉下嘅鄉村式渡假屋玩，享受下田野風光，園林美景，摘樹熟嘅生果食，飲新鮮椰子水。果園有幾棵腰果樹，果形倒卵圓，未熟嗰陣係黃色，到熟就變紫紅色，果肉微甜帶澀，露出腎形果實。

我哋分工摘果，一個人用枝一頭有綁個釣嘅長竹一扯，另一個就用個膠桶接住啲熟紅腰果，然後掹粒果核放入燒剩仲有火嘅爐頭木炭內面，大概一，兩分鐘後攞出來，摝咗層燶黑嘅殼，然後放粒香，脆，爆嘅腰果入口，左牙噍過右牙香嗰種滋味，依家諗起就留口水啦！

管家嘅太太摘新鮮蔬菜煮正宗地道越菜畀我哋食，飯後我會搵個靚位，掛張吊床瞓晏覺…涼風輕輕吹，樹葉搖曳擺動，娑婆樹影，疏間陽光照面上，忽亮…忽暗…間中聞到從廚房木炭所散發嘅煙火味，加埋收音機播唱嘅「南部改良曲」…好寫意，好安逸嘅感覺，至今難忘啊！

解放後阿姑丈冇生意做就決定搬去鄉下住，第一可以減少生活費，第二可以守住佢啲田地，避免財產被政府充公或被人霸佔，西貢嘅屋就交畀我表哥睇。姑丈姑媽有錢嗰陣比較低調，所以番鄉下住都冇俾「打資產」，真係好彩！表哥當過太子兵，所以佢只需要上短期「學習改造」課程就獲批準番屋企。表哥以前淨係識打band，識洗錢嘅太子爺，冇咗靠山就要自力更生啦，佢响豪宅天台嘅涼亭釘籠養雞，冇得做「城市獵人」，就做「城市農民」囉！佢好識時務，好嘢！哈哈。

農民都要做賣買吧，最終都唔離得開個「商」字，由「個體經營」轉「集體經營」，「國營」和「合作社」，我哋又學多幾個新名詞。姑丈嘅田地係用來遊山玩水，並冇生產價值，所以又好彩冇俾「邀請」入合作社。地方政權組織好多關於「集體經營」學習班，正當表弟冇書讀，又冇工作，姑媽有啲本錢就決定買兩架巴士交俾表弟管，參加「合作社」經營方式。然而…所有收入先交合作社，由合作社發糧畀雇員，剩番嘅錢先至係自已，維修車費由車主負責。表弟跟車走上走落都好辛苦，又整日同各行各業嘅江湖人物混，加上分紅又唔多，最後姑媽決定宣佈「解體」，賣巴士，脫離合作社，佢嘅身家又縮水咗一大段。

好似我哋經常睇過嘅電視劇集咁…「過氣老細」受唔起厄運，不堪一擊… 我嘅姑媽健康日益衰退，唔到幾年就過世，姑丈割開一幅地用來安葬姑媽，然後賣晒田地，離開傷心地，番西貢住响巷內一間小石屋，同表弟家人度餘生。依家買佢田地嘅主人全部發晒達，姑媽舊居已改建電油站，田地填平起商店，旅館，每次我路經見到都不禁嘆息！唉！

姑媽去世嗰陣，我啱啱離開越南，未有機會孝敬佢老人家。之後每次有機會回越探親，我都去拜訪姑丈，探望姨媽等長輩，小小禮物手信，短暫聚會，比起佢哋對我嘅愛護，簡直係蚊同牛比啊。佢哋桑田滄海嘅際遇，令我見証到時勢變遷，佢哋對我嘅待遇，令我見証到親情。我呢次回顧充滿歡樂嘅童年往事，當係我對姑媽，姑丈，姨媽嘅一啲敬意，思念吧！所以今期呢段古全部講私人嘢，希望同學仔体諒。

有句話：「人生係舞台…」睇下我哋週圍，每一個人都有自已嘅故事，差別係…你可曾陳述？可曾分享你嘅故事呢？與人分享自已感受係心靈嘅解脫方法之一，好似我咁講晒啲嘢（吐晒啲廢氣）畀你聽，真係整個人輕鬆晒，當然除咗銀行資料，往日心中情，陳年舊債，唔見得光嘅嘢…例外，哈哈。

歡樂唔係淨係自已有，悲哀亦唔係只有自已受。記得我阿媽嘅口頭禪「唔洗怕，大把人陪…」。所以同學仔依家要記住啊，當你/妳高興歡笑，亦或傷心失意…”You are not alone！” 唔洗怕， 有我哋「陪在你左右」，「陪你走到底」，「陪你一起看草原」，「陪你一起『老』」…上吉如就見「我在你左右」，把我们的悲哀送走，送到大街头…

係咁多先，下次再見—翠群

photo 1: 昔日我與同學仔組織去姑媽嘅果園郊遊時留影

photo 2:認出以上靚相中嘅靚女係邊個呢？猜中有獎免費古仔一篇