翠群四十年回憶錄(七): 鳴遠以後的日子(翠群) (09/28/14)

鳴遠以後的日子—「個肚咕嚕响，不再有理想」

「…首先我要多謝吉如畀我好多機會發噏風，多謝網友支持我，更加要多謝我師父，師兄弟，師姐妹唔謙氣我嘅廢話…」

同學仔係唔係覺得以上所講似曾相識呢？冇錯！每次上台領獎嘅人一定係咁講，所以吉如咁讚賞我（請參考上期，嘻嘻），我憑空想像自已似明星咁聽見被「誇獎」就嗱嗱臨上「站」講番幾句謝詞，「屏幕」前看官就會諗…簡直係講緊廢話，哈哈！好嘞，廢話少講，呢期我繼續「廢話連篇」續集…呵呵！

我哋生活响新舊制度交接其間，永遠係輸虧。但係有頭腦嘅人會識時務，趁機會搲銀。「時勢造富豪」，正當大細老闆，好似我阿姑丈咁要賣田賣地來維持生活，而用真金白銀來買地買屋嘅人係普通一般嘅鄉下村民，佢哋好好嘢，响新政權之下反而發達咗！風水輪流轉吖嘛，有句「勞動係光榮，勞動係幸褔」，所以勞動界咪發達囉，我哋呢啲斯文人想搵餐飯就要學好勞動啊。

大老闆賣晒田地就要攞小小本錢來做啲小生意，嗰陣大工廠全部閂門，生活必需品由外邊小批咁偷偷運入西堤，仲有大本錢嘅「過氣老闆」就開番檔家庭式雜貨或工廠或者收購貨物站，等等。冇大本錢就做小販或者開始學運貨。所謂「運貨」就係响鄉下原產地，直接買小包煤炭，幾公斤生豬肉，一啲白米，然後左隱右掩咁運入西堤，然後自已販賣或交畀收購人。運貨過程中唔好彩就被公安「充公」，失晒本錢仲俾罰錢，好慘喎！猜想同學仔都經歷過或見証過咁嘅場面吧！我並冇加鹽加醋，當時的确係咁，政府分配糧食係唔夠食，黑市貨咪係咁樣來囉！

我一個阿姨本來係幫一個法國家庭做主厨，阿姨專門做西式美食，有一手好厨藝，每次去探佢就一定有香噴噴熱辣辣嘅牛油蛋糕食，依家諗起都流口水呢！然而當佢嘅老細舉家返法國之後，係寡婦嘅阿姨要養三個仲讀緊書嘅仔女，阿姨真係好艱難，記得佢啱啱冇嘢做曾經同我一齊研究煮豆精賣，阿姨攞本錢買一架小販推車。一個人第一次做推車小販，佢好驚要我陪佢去。

我哋兩個推架車到一間小學附近擺檔，唔知係唔係做小販要有個樣呢？可能人家一望阿姨同我就知我哋係初哥（除咗細佬仔唔計），因為我哋賣咗兩杯豆精俾兩個細佬仔，就見一個男人來問我哋「呢豆精有冇落糖精吖？」，嘩！俾佢一問，我哋臉都青埋，快快拾嘢走，因為…真係有落糖精…哈哈！嗰日我哋淨係賣得兩杯豆精俾兩個細佬仔，剩番就自已當茶飲晒！自從嗰次阿姨唔再諗住擺檔做小販嘞。

困境會令人体驗到親情，亦會有人体驗到虛偽，欺詐…但係無論有邊一種遭遇，無論曾經做過乜嘢貴賤行業，若响艱辛苦難處境中仍然能够生存落去，係值得自豪嘞！所以依家同學仔同我一齊舉右手，拍自已左邊膊頭幾下自勉，好嗎？

係咁多先，下次再見—翠群