翠群四十年回憶錄(五): 鳴遠以後的日子(翠群) (09/13/14)

學濤兄，我要到星期尾先至有時間上吉如吹水，遲咗回覆您，唔好意思哦！

講到嗰個巨型月餅，上個拜日我原本想等超市老闆辦開刀儀式，然後分一份食，可惜到嗰日我忘記咗。第二日走去睇仲有少半個，其餡係純蓮蓉，冇乜特別。

講起來我响越南嗰陣完全冇諗到「有將來」，更加唔會諗到學糕點，所以「走佬」出來乜都唔識，乜都要從頭學起，遲啲如果我講古到呢個時點，再詳述吧，相信會勾起曾經逃離嘅同學仔一啲啲…回憶。

其實我發表嘅貼子全係粗文俗語，不登大雅之堂，可能係講關於普羅大眾嘅事，所以看官有共鳴，對嗎？因為我有好多少年陰影難忘事，每次得閒坐低飲啖茶食個包，上吉如講古，往事就會如歷眼前一一浮現出來，所以寫得傳情啲吖嘛！多謝讚賞，大家高興，我高興，嘻嘻。

講到特效西藥，我諗起75/76嗰陣，好興「自供自養」，「自力更生」等口號。家家戶戶派代表去參加坊郡組織嘅會議，學種田養豬，一時之間街市好似個農場咁，哈哈！雞仔，鴨仔，豬仔…好好賣。我哋以前未試過養猪，剛啱有位好同學仔嘅餐館負責幫「部隊」煮食，我就問佢畀啲剩飯餸來餵豬，然後阿媽去街市搵隻好可愛嘅豬仔買番屋企養，我哋屋企厨房有個天窗，放豬仔响厨房嗰度，大小便就用水通落水渠。

唉！諗落真係好唔衛生啊！唔知當時本地政權鼓勵我哋「自力更生」嗰陣，有冇諗到呢個問題呢？同學仔到訪都唔知我哋養咗隻豬仔，佢仲以為係狗仔呢，因為豬仔見人來就搖尾歡迎，哈哈，依家諗番都幾得意。

然而响咁環境生長，豬仔點會健康呢？日日踏單車去同學仔餐館攞糧食畀豬仔，阿媽日日洗掃厨房，結果…養咗大概兩個月，豬仔病咗，我哋心慌，唔知點算好，豬仔依家已經唔係普通畜牲，而係我哋嘅寵物囉！

我去詢問西貢地攤商，佢哋介紹買咗啲特效藥，針筒，一本畜牧書，就咁…我當咗「黃綠獸醫」，先至學識係响猪耳仔打針，好有趣！之後猪仔精神好番幾個禮拜又再患「厭食症」，由肥猪變瘦豬。

最後阿媽逼不得己，決定賣佢畀燒臘鋪做乳猪。唉！當初我哋幾咁高興彩烈迎接阿媽坐xich lo帶猪仔番哩，就幾咁傷心目送阿媽坐xich lo帶豬仔去畀人做佳餚。

經過呢件事，我体會到一句話…「不要聆聽他人怎麼說，而要觀察他人怎麼做」…嘻嘻，你明我講乜嘞！猜想你都曾有類似際遇吧！

係咁多先，下次再見—翠群