新話題，同大家吹吓水 (羅偉銓) (07/28/14)

今日無聊，得閒揾個話題同大家吹吓水。

悉尼西區一座寺廟

明月居士林

唔經唔覺今年都去咗一半，上個星期六日抽啲時間入寺廟幫手，準備七月十四盂闌節，嗰日地府大開鬼門關，俾啲鬼魂出外揾食，寺廟開壇做法事，為咗方便親人拜祭，寺廟需要準備大量金銀衣紙，冥衣，冥鈔，一班義工執好一份份，將於七月十四正日出售，等善男信女，孝子賢孫，拜祭仙人，供奉祖先。

義工正處理冥紙

呢啲俗例係我地中國，及亞洲，佛教，都唔知傳咗幾多千百年，我本人就有一個疑問，每年清明，重陽，盂蘭節，做子孫嘅，都會上墳場或到寺廟靈位拜祭，但我地嘅信仰(唔包括所有人仕)都係相信死後會輪迴轉世投胎。

咁就奇怪，既然過世之人仕會轉世投胎，做乜仲要供奉燒啲冥衣冥鈔，等先人過活，兩件事好唔合邏輯，一方面希望過世之親人轉世投胎，另一方面又燒衣拜祭。咁樣結論係投咗胎做人呀或者仲响下面等接濟喎！

講完呢個話題又有另一個，其實我呢個問題都幾贑車，我都係發吓噏風，大家傾吓世間事啫！希望唔好得罪有宗教信仰之人仕。

世間上有好多唔同宗教，亦有好多人種，每一個宗教或人種都有佢自己嘅信仰，依家唔好理世上係唔係有天堂地府，神仙鬼怪，幽靈寃魂，天主大帝，亦唔講有冇投胎呢個問題……我地亞洲拜神，拜祖先，拜離世嘅親人，做事做節都燒元寶蠟燭，燒冥鈔，冥衣等等，好俾先人有好日子過，咁---某一啲人種，宗教，去吊祭離世嘅親友只一束鮮花，花--食唔飽咘，又冇錢洗，又冇冥衣替換，大家點睇，亞洲故人就有陽間親人燒冥鈔，冥衣，什至乎送大屋，靚車，仲有侍從妹仔，咁冇呢個俗例嘅仙遊人仕又點攪。

逢初一十五，都有做法事

及義賣食物

寺廟亦大量供應免費午餐齋菜

哈哈傾埋啲唔三唔四，有怪莫怪，細路哥唔識世界。

平生不做歪心事，半夜敲門也不驚。百無禁忌。