又到時候飲杯茶食個包呵，今期特別啲，因為要諗返鳴遠以後嘅日子，真係唔好過。原本打算吹下水講番以前响鳴遠嘅趣事，目的係慶祝畢業四十週年吧，點知越講越過癮，講到冇嘢講就想暫停唞下啖氣，點知老友盛情難拒，局住再闖江湖。呢期風險多囉，因為大家有唔同際遇，可能唔知我嗌乜，咁就…我盡量講難忘嘅「大件事」啦，至於細節例如時間地點等等…我可能忘記，冇辦法提供啦，咁就要靠大家加鹽加醋調味囉，哈哈。在此聲明，此單元所述嘅事純屬個人際遇，歡迎網友支援，但請不要參議政治批評爭論為盼，謝謝。
講古要有開場白，上期講到畢業就係失業，等待越文學校入學嗰陣，唔知點過日子，又唔幫到亞爸，亞媽又嫌自已阻手阻腳，只好日日踩單車周圍逿，差唔多每日至少去探一個同學仔，因為咁…我哋仲繼續有联絡。日子係咁過，平淡無聊…直至暑假過後，入讀Van Hoc。
Van Hoc 係一間當年比較出名嘅越文私校。校長係一位貌不驚人嘅詩人兼哲學家Nguyen Sa。佢有一首詩好出名‘Ao Lua Ha Dong’，聽話全靠嗰首詩先至追到又靚又有錢嘅老婆。一部分鳴遠同學亦登記讀十二班，因要選科例如Ban A（好似文科） 或Ban B（數理化），加上學生多，所以我哋分班了。大家亦有見面但淨係講幾句就走人，再冇機會組織郊遊或茶會啦。間中聽見有同學結婚，我哋就「哇！」一聲，相信嗰幾位早婚嘅同學仔亦好早就做咗亞嬤亞爺囉！
由白衫籃裙轉成越南ao dai白長衫長衭，認真痲煩啊！尤其踩單車嗰陣，咪以為好似MTV咁，長髮靚女，著長衫踩單車，兩襬輕紗，隨風飄曳，哈哈…咁諗就錯囉，分分鐘嗰個長衫襬被捲入車輪，乜嘢詩情畫意都冇晒囉，所以我哋要一係…摺衫襬入衭頭內（好粗魯），二係挾衫襬入車座墊（好異相），闊衭腳亦要挾起來，咁樣先至冇抅爛衫衭。所以話噻…越南美人唔係真實呀，嘻嘻。不過…短短一年响越文學校，結識到幾位越南同學仔，增加唔少文化交流機會，人生多啲色彩，都唔錯哦。係咁多先，下次再講過。再見！「長衫一族」—翠群
You are visitor #
真係唔話得啊，吉如照顧好周到，幫我貼咁多美女圖，多謝妳！啱啱第一期就有過50次點擊率，真令人興奮，今日肯定多嘢講囉，哈哈。
ReplyDelete越文私校好商業化，上課冇點名，只要學生有交學費就得囉。記得嗰間學校係一幢孖鋪面幾層高嘅樓，校內冇操場亦冇停車場，學校附近有專營寄車生意嘅停車場，學生就要响嗰度寄車。所謂停車場其實係巷內幾間住家屋外一個空地，用鐵絲網圍住，上面蓋瓦坑鐵。每次有人推車入來，突然間聽見有人嗌一聲「有客（Co Khach）」…即刻有人响其中一屋內「飛」出來招呼客仔，唔慣嘅新客真係俾佢吓一跳。單車，機動車分開放，寄車管理員發俾客仔一張有號數嘅細紙牌，然後用粉筆寫個號數响車座墊。有一次落雨，擺响停車場側邊嘅單車被雨淋濕咗。慘囉！冇咗個號數，又冇車鎖匙，淨係得張紙牌，點樣証明架車係自已呢？結果我要等到夜晚停車場收檔，剩番架爛單車冇人領，先至俾我攞番架車，真係…深海石斑— 好瘀，嘻嘻。自從嗰件事，我要配條車鎖鏈以防萬一，見過鬼，仲唔怕黑咩。
第十二班係最緊張嘅一年，學生一放學就好似滾水淥腳咁，急急趕去上補習班。雖然响學校淨係讀一晝，上午或下午班，但補習時間就占咗半日囉。有啲出名嘅數學補習班要去到Ba Chieu， Gia Dinh上課，所以最普遍係讀「會考訓練班」。似咁嘅Lop Luyen Thi開到成行成市，真係好好搵（錢）。大家都希望會考成績好，獲優等Hang Uu，所以日日咪書，近視都加深度數嘞。同學之間嘅話題都係講考試，承日聽都厭哦。唉！一大朝早返學就見到一個個冇離神氣咁嘅樣，面青青，睇見都驚，哈哈…唔知唔覺自已都緊張埋一份。東南亞學生讀書認真搏命，唔似而家啲細路仔，有時父母好似跪地餵猪乸咁，噅佢哋…「阿仔乖嘞，慬力啲讀書…」，冇符嘞，時代唔同吖嘛。
係咁多先，下次再講過。再見！「吹水一族」—翠群
好耐冇坐低飲杯茶食個包，今個週末覺得特別好疏付，又有靈感懷舊嘞。
ReplyDelete西貢，嘉定有好多嘢唔同堤岸，尤其係飲食文化。華人鐘意去西貢食純正越南餐，反過來越南人就喜歡去堤岸食唐餐，所以呢…我同越南同學仔兼職做「美食專家」，「文化大使」，一空閒又有啲零用錢就會從堤岸食到西貢。學生仔經濟有限，當然係踎街邊食大排檔嘞，原來越南同學仔好鐘意食芝麻糊，花生糊之類嘅糖水。依家若果夜晚去堤岸第五郡好出名嘅糖水檔睇下，會見到多數越南後生仔女，衣著時髦，駛新型機動車，坐响街邊…食得津津有味！
西貢龜池（Hồ Con Rua）有幾檔雪糕好出名，放學時間檔檔都係高朋滿座，有時冇位坐，客人坐响自已車座墊食都肯呢。最受歡迎係香草味（lá dứa pandan leaves），榴槤味，椰子味雪糕。食完雪糕有免費一杯冰凍薄荷水，飲落去真係涼透心脾，响嗰度食嘢好經濟實惠，唔怪之得咁好生意。解放後雖然老闆已出國，但因地點已成雪糕名街，所以其親人繼續營業，至今雖然其產品改變好多，但依然好好生意。
記得有兩樣食品曾風魔一時，唔知各位同學仔有冇留意呢？bánh mì gà（雞絲麵包） 和cốc tay（雜果飲品），响西貢有好多專門賣獨特一味雞絲麵包或cốc tay嘅小檔攤，每到餐期都逼滿人買。想像下…炒到香香嘅雞絲加啲自製蛋黃醬（mayonnaise）和青蔥芫茜擺入鬆脆法式麵包…再走到隔籬檔買杯（其實係用塑膠袋包）cốc tay，新鮮熱帶生果加酸酸嘅sơ ri果…嘩！好讚嘅套餐！可惜解放後，呢啲檔攤踪跡全失，真懷念當年的滋味啊！飲食一族—翠群
妳真係好野！仲記得咁多地方有好野食，若越南冇解放，依家可能妳已經成為一位出名食家，食通街。
ReplyDelete係呀！講番食真係好懷念當年嘅美味，講是講，依家返去食又唔覺得係咁正，可能三十多年前，離鄉別井時，定居响一個唔足夠亞洲食品嘅番邦國家，煮出嚟嘅野點會好味，可能咁嘅原因腦海一直都認定越南會好味得多，到今時今日亞洲食品市場樣樣齊，食物又豐富，煮起上嚟唔會比越南當地差，依家再返去食，我就覺得麻麻啫！唔止咁，未出發去越南時，個心就想返去食乜食乜！但過到去見到就唔敢試，怕個肚唔爭氣，我就領教過，去兩次兩次個肚都水長流，上次去仲攪到要入醫院添，因肚瀉，去得太多爆肛，成盆血，嚇我一跳，仲以為大件事，所以嗱嗱林入醫院檢查，真係成個人慌晒，怕怕，上次去我都好小心，都唔敢食街邊野，中礁嗰次係食牛肉七味，近同慶酒樓嗰間Bacolac，唔係啲牛肉唔乾淨，我諗弊就弊响啲香花菜，生菜度，佢都係用水喉水洗，點會用蒸餾水同您洗菜，唉！依家個肚驕生慣養咗，小小唔掂，佢就作反。
講懷念，我都好回味解放後，街邊檔賣嘅牛扒王，鐵板上枱，冇得彈！唔知係唔係解放後牛肉小咗，自己又咁頂尖中意食牛肉，冇法啦，又貴又韌都要食，仲有一樣都係我至愛，ga xoi mo，即叫即做，將滾油係咁淋隻雞，淋到熟唯止，皮脆肉滑，一流，正！
偉銓